بالی ووڈ کے سپر اسٹار شاہ رخ خان کی آنے والی فلم 'کنگ' ایک بار پھر خبروں کی زینت بن گئی ہے۔ اطلاعات کے مطابق، فلم میں شامل ایک شاندار ایکشن سین پر تقریباً 50 کروڑ روپے خرچ کیے گئے ہیں، جس کی شوٹنگ یورپ کے حقیقی مقامات پر کی گئی۔ یہ سین بھارتی سنیما کی مہنگی ترین ایکشن سیکوئنسز میں شمار کیا جا رہا ہے۔
'کنگ' کی ہدایت کاری معروف ایکشن فلم ساز سدھارتھ آنند کر رہے ہیں، جو اس سے قبل 'پٹھان'، 'وار'، 'بینگ بینگ' اور 'فائٹر' جیسی بلاک بسٹر فلمیں دے چکے ہیں۔ فلم میں شاہ رخ خان کے ساتھ ان کی صاحبزادی سہانا خان مرکزی کردار میں نظر آئیں گی، جب کہ دیپیکا پڈوکون، ابھیشیک بچن اور رانی مکھرجی بھی اہم کردار ادا کر رہی ہیں۔ فلم کو کرسمس 2026 میں ریلیز کرنے کا منصوبہ ہے۔
فلمی ویب سائٹ بالی ووڈ ہنگامہ کی رپورٹ کے مطابق، 'کنگ' کا یہ ایکشن سین دس دنوں پر مشتمل ایک خصوصی شوٹنگ شیڈول کے دوران فلمایا گیا، جس پر روزانہ تقریباً پانچ کروڑ روپے خرچ ہوئے۔ یورپ کے مختلف مقامات پر فلمائے گئے اس سین کو فلم کا سب سے بڑا اور فیصلہ کن لمحہ قرار دیا جا رہا ہے، جس کا مقصد شائقین کو ایک یادگار سینما تجربہ فراہم کرنا ہے۔
رپورٹ میں یہ بھی بتایا گیا ہے کہ اس ایکشن سیکوئنس کی تیاری اور منصوبہ بندی میں شاہ رخ خان نے خود گہری دلچسپی لی۔ انہوں نے نہ صرف اس سین کے ڈیزائن اور تصور میں حصہ لیا بلکہ شوٹنگ کے دوران ایکشن کی نگرانی بھی کی۔ شاہ رخ خان طویل عرصے سے بڑے پردے کے لیے غیر معمولی اور بین الاقوامی معیار کے ایکشن مناظر پیش کرنے کے خواہشمند رہے ہیں، اور 'کنگ' میں یہ خواہش عملی شکل اختیار کرتی دکھائی دے رہی ہے۔
اس ایکشن سین میں شاہ رخ خان اور ابھیشیک بچن کے ساتھ ایک خصوصی تربیت یافتہ ٹیم نے ہائی آکٹین اسٹنٹس انجام دیے۔ حقیقی لوکیشنز پر شوٹنگ، جدید ایکشن کوریوگرافی اور بڑے پیمانے کی تیاری نے اس سین کو فلم کا سب سے مہنگا حصہ بنا دیا ہے۔
'کنگ' کی مجموعی لاگت تقریباً 350 کروڑ روپے بتائی جا رہی ہے، جس میں تشہیری اخراجات شامل نہیں۔ شوٹنگ جون 2026 تک مکمل ہونے کی توقع ہے، جس کے بعد فلم کو کرسمس کے موقع پر سینما گھروں کی زینت بنایا جائے گا۔ فلمی حلقوں میں 'کنگ' کو آنے والے برسوں کی سب سے بڑی ایکشن فلموں میں شمار کیا جا رہا ہے۔
Shah Rukh Khan Starrer ‘King’ Shoots Massive Rs 50 Crore Action Sequence in Europe
No comments:
Post a Comment